Blog-Musicanaescola

A Consellería de Educación, concretamente a Dirección Xeral de Formación Profesional e Ensinanzas Especiais, pon na rede un buscador de recursos musicais de autores galegos, onde é posible pescudar obras musiciais de máis de sesenta compositores galegos.

Musipedia é un buscador de melodías. Dispoñemos dun teclado onde podemos ir tocando o anaco do que desexamos facer unha busca. A páxina procura anacos que conteñen esa secuencia, identificando o autor e o título da mesma.

Moitas veces precisamos nos nosos equipos informáticos un útil e cómodo reprodutor de audio ou vídeo que, ademais de gratuito, consuma poucos recursos. Na páxina que a continuación sinalamos, ofrécesenos unha estupenda comparativa dos mellores reprodutores. Xa podemos adiantar que o KM Player é un dos mellores. Deste xeito teremos unha razón máis para fuxir do monopolio de Micro$oft.
Aquí está a comparativa

As orixes do órgano actual están ligadas á auga, posto que o seu antecesor foi o Hydraulus ou órgano hidráulico. Este tipo de órgano utilizouse ata o século XII. Durante o Renacemento e o Barroco os órganos hidráulicos se construían en xardíns, covas e palacios. Desde o XVII caeron en desuso debido ao custe elevado do seu matemento.
No órgano hidráulico, un pequeno tubo está situado de xeito que un extremo está aberto ao aire y e o outro chega até un tubo máis grande que contén agua dunha fonte, lagoa ou encoro. Canto máis longa sexa a caída vertical da agua, máis poderosa será a succión e maior será o volume de aire aspirado.
A nova tecnoloxía permite inventar novos instrumentos. O hidraulófono emprega a auga para producir son. Os dedos tapan chorros de auga para xerar o son. Vexan algunhas posibilidades deste instrumento:

Cantan ellas é un blogue adicado integramente á canción interpretada por voces femininas. Contén audicións, traducións de letras de lieders e anacos de ópera, preséntanse varias interpretacións da mesma obra para facer comparacións… En definitiva, un sitio para pasar horas e horas escoitando e aprendendo…

A misa en do menor KV 427 de W.A.Mozart é unha xoia musical pola súa inspiración, pola súa fondura, polo seu lirismo e polos momentos brillantes e de extraordinaria beleza que nos brinda. É música, MÚ - SI - CA. Pode ser creente ou non creente, pero esta música de Mozart chegará ao fondo da alma, non lle deixará indiferente, ten o inmenso poder de elevarnos cara un mundo marabilloso de sons e sensacións. Se non a coñecen, anímense a entrar neste fermoso mundo.

Inspirándose nesta misa, concretamente no fermosísimo Kyrie, Mozart compuxo un exercicio de solfexo, Solfeggio in F , que nós brindámoslle en versión para clarinete e fagote, para que distingan claramente a melodía…

Os días 17, 24 e 31 de agosto, na Colexiata Santa María A Real de Xunqueira de Ambía. Ourense ás 20,00 horas, con entrada libre, desenvolverase o XIX Ciclo de Órgano e Música Antiga. Este evento está organizado polo Concello de Xunqueira de Ambía e subvencionado por CajaDuero e a Consellería de Cultura e Deportes da Xunta de Galicia.
Un ano máis chega ata nós este ciclo tan fermoso e como de costume, cunha grande calidade nos intérpretes. O día 17 de agosto, tocará Carlos Rodríguez Lajo, organista salmantino que representa á nova xeración de organistas. O día 24 de agosto, será a quenda de Juan de la Rubia, o organista máis galardoado da súa xeración e un auténtico mestre da improvisación. O día 30, Soledad Mendive (órgano), concertista e profesora de órgano do CMUS de Ourense e Sergio Guarné (trompeta) tocarán a dúo e como solistas, dándolle variedade ao ciclo.
Esperamos a calorosa resposta do público que, ano a ano, vén respondendo admirablemente ben ante a calidade dos músicos e da música que soa dentro deste fermoso templo e que ten como protagonista a ese marabilloso órgano ibérico, que recibimos dos nosos antergos e que, entre todos, temos que coñecer, valorar e mantelo nas mellores condicións posibles. Este é, sen dúbida, un dos obxectivos principais deste ciclo.

A Sinfónica de San Francisco (SFS) con Michael Tilson Thomas está a facer o grande labor de achegarlle as grandes obras sinfónicas de todos os tempos ao público dun xeito moi didáctico. Nesta liña, atopamos un material que facilita a comprensión da Terceira Sinfonía “Heroica” de Beethoven en Mi bemol Maior.
Pódese seguir a partitura, ver á vez un vídeo sincronizado coa mesma e seguir explicacións sobre a forma, a instrumentación, as tonalidades polas que transcorre esta obra. Todo en inglés, pero coa linguaxe musical xa saben que non hai fronteiras…

Terceira Sinfonía pola SFS

Seguindo coa publicación das “Seis Fuguetas” de Haendel, agora imos coa número 3, unha pequena peza en Re Maior con algúns momentos de beleza sonora.
Fugueta nº 3.
Para descargar a versión en pdf, premer nesta ligazón

Estupendo vídeo en castelán sobre a fabricación dunha trompeta.